POEM: Hiwaga

HIWAGA
by Huggs

Ano ba meron sa iyong pagkatao
At lahat ng lalaki sa iyo’y naloloko
Meron ka bang hiyas na wala ang iba
O dahil isa kang babaeng engkantada

Kumislap ang langit ng ika’y natanaw
Malapit na ba ang mundo’y magunaw
Dahil ba ngayon lang nakakita
Ng isang dilag tunay na mahiwaga

Nagliliwanag ang paligid ng ika’y makausap
Humuni mga ibon sa paglipad sa alapaap
Umuusbong mga bulaklak sa hardin ng pangarap
May pagkakataon kaya na ika’y mayakap?

Nagdadalawang-isip na ako’y magtapat
Ng aking damdaming sadyang di nararapat
Di dapat akong umasang iyong iibigin
Pagkat ang tulad mo di dapat biruin

Minsan mo nang nabihag itong puso
Ngunit ayoko nang may luhang tutulo
Kung kaya’t hayaan mo na lang ako
Sa’yo’y umiwas at magpakalayo…