POEM: Akala Ko

AKALA KO

by Huggs

Akala ko noon ikaw na nga
Ngunit bakit ganon may humadlang pang iba
Naglahong bigla magagandang pangarap
Inangkin ng iba at ngayo'y naghihirap

Akala ko noon pangako'y matutupad
Ngunit bakit ganito sa iba napadpad
Sumpaang akala ko'y panghabambuhay
Yun pala, sa iba mo lamang iaalay
.
Akala ko dati'y akin ka na...
At ako'y iyo, buong puso't kaluluwa
Dahil lang me lumandi sa iyo kanina
Nakalimutan mo na't biglang nangaliwa

POEM: Handog

HANDOG

by Huggs

Huwag kang mag-alala kaibigan
Wala naman akong nais ipagdikdikan
Di ako interesado na mapasaiyo
Tangin kaibigan lamang ang maihahandog ko

Huwag bigyang kahulugan aking paglalambing
Hanggang dito lamang sa iyo'y aaminin
Huwag mo nang ipilit na may pagtingin ako
Pagkat masasaktan ka lamang sa piling ko

Maraming nang umiyak sa aking nakaraan
Sa bawat tulo ng luha ako ri'y nasasaktan
Kung kaya't ayoko nang paulit-ulit lamang
Nasasaktan ko na pala di ko pa nalalaman...
 

POEM: Lansangan

LANSANGAN

by Huggs

Inangkin na nga ninyong lahat
Pati salawal di pa ba sapat
Gusto pang makita itinatagong lawit
Paano uuwi, saan na nga ba iiipit

Maglalakad pa sa gitna ng kalsada
Tatawid rin pati sa kahabaan ng EDSA
Ano ba ito't ako na'y nahihiya
Hubo't hubad pinagtitinginan ng masa

Nasaan na bang matatabang pulis
Di ba ninyo aaksyunan ng mabilis
Pagkat di na nakakatawa ito
Dumadami nang nagkalat na barumbado.

POEM: Lihim

LIHIM

by Huggs

Akala ko noon nakuha ka na niya

Bakit ngayon tila nag-iisa

Maari mo bang sabihin anong kanyang ginawa

At ngayon ay di mo siya kasama?

Matagal na akong may pagtingin sa iyo

Ngunit anong magagawa at torpe ako

Naunahan na nila't sila'y iyong pinansin

Ako naman, heto kasama ng mga dingding

Bumili na ako ng rosas para ipadala sa iyo

Ngunit nagdalawang isip, "itutuloy ko ba ito?"

Kung kaya't itinapon na lang ang napagplanuhan

At ang nakinabang --- ang basurahan

Sayang mga pagkakataon kung iiwan ka lang din niya

Sana ako na lang baka sa akin ikaw'y lumigaya

Aking ipaglalaban ang pag-ibig na sisimulan

At hinding hindi kita iiwanan

 

POEM: Manggagawang Pinoy

MANGGAGAWANG PINOY

by Huggs

Hirap at pawis kanilang puhunan

Makamit lamang ang magandang kinabukasan

Maliit man ang kita sa bawat gawa

Dedikasyon sa trabaho kanilang pinapahalaga

Dumugin man ang bayan ng mga sakuna

Ipagkait man ng kalikasan kanilang mga lupa

Kabuhayan, pilit pa rin kanilang isinasalba

Pinoy na manggagawa, masipag at matiyaga

Di kayang buwagin ang ating lakas

Di lalaon, hirap magwawakas

Ating ipagmamalaki kanilang mga nagawa

Buo ang loob, sa hirap man o ginhawa


 

POEM: Ang Makata

ANG MAKATA

by Huggs

Ano bang agimat

Ginintuang alamat

Pinamana ni Ama

Ipinapakita sa iba

Mapaglarong isip

Ilan ay panaginip

Tanging isinasalaysay

Makukulay na buhay

Susugatan ang puso

Dumadanak na mga dugo

Pag-ibig na bigo

Lahat nabibilang dito

Tula'y di magwawakas

Ngayon man o bukas

Hangga't may buhay

Bukas palad aming ibibigay


 

POEM: Dyip

DYIP

by Huggs

Nag-krus ang ating landas ng di sinasadya

Di ko akalain dito pa kita makikita

Sa pupugak-pugak na dyip na sinasakyan

Ang iyong pag-upo di ko namalayan.

Tumabi ka sa akin at mata'y nagtagpo

Tiningnan mo ako mula paa hanggang ulo

Sabay sinabi mong "Huy! Ikaw pala yan"

Dito nagsimula ang ating kwentuhan.

Di nagtagal malapit ka nang bumaba

Iniwan mo iyong numero sa aking bulsa

Sabay sinabi sa akin "ako'y magpapaalam na"

Kailan kaya tayo muling magkakasama?

Dumating na rin ako sa aking patutunguhan

Iyong mukha naglalaro pa rin sa aking isipan

Hinagilap ko ang papel na binigay mo

Ngunit di ko makita, nahulog yata sa sinasakyan ko!

Naiinis ako't di ko makita sa aking bulsa

Nanghinayang ako't bakit ngayon nawala ko pa

Mag-aabang na lamang akong muli kang makasama

Sa dyip na sinasakyan, gabi man o umaga.